بہاولپور صوبے کی بحالی سے چشتیاں سمیت خطے کے پسماندہ علاقوں کو انتظامی ترقی مل سکتی ہے، محمد مکرم خان

چشتیاں (جاوید اقبال سے): قومی و بین الاقوامی امور کے تجزیہ کار اور کالم نگار محمد مکرم خان نے کہا ہے کہ تاریخی صوبہ بہاولپور کی بحالی محض سیاسی مطالبہ نہیں بلکہ خطے کے عوام کی انتظامی، معاشی اور بنیادی ضروریات سے جڑا اہم معاملہ ہے۔ نئے صوبوں کے قیام کا اصل مقصد اختیارات کی نچلی سطح تک منتقلی، وسائل کی منصفانہ تقسیم اور عوام کو ان کی دہلیز پر سرکاری سہولیات کی فراہمی ہونا چاہیے۔

اپنے بیان میں انہوں نے کہا کہ ضلع بہاولنگر کے شہریوں کو اعلیٰ تعلیم، علاج، عدالتی امور، ریونیو معاملات اور دیگر سرکاری خدمات کے حصول کے لیے اکثر دوسرے شہروں کا سفر کرنا پڑتا ہے۔ اس سے خصوصاً غریب اور متوسط طبقے کے افراد کو اضافی اخراجات اور وقت کے ضیاع کا سامنا کرنا پڑتا ہے۔

محمد مکرم خان کے مطابق بہاولنگر ایک اہم ضلع ہونے کے باوجود جدید طبی سہولیات، اسپیشلسٹ ڈاکٹروں، اعلیٰ تعلیمی اداروں، عدالتی دفاتر اور اہم انتظامی و ریونیو سہولیات میں مزید توسیع کا متقاضی ہے۔ دور دراز دیہی علاقوں کے رہائشیوں کے لیے علاج، بچوں کی اعلیٰ تعلیم اور زمینوں کے تنازعات سے متعلق امور نمٹانے کے لیے دوسرے شہروں تک پہنچنا ایک بڑا مسئلہ ہے۔

انہوں نے کہا کہ صوبہ بہاولپور کی بحالی یا جنوبی پنجاب اور بہاولپور کے علاقوں کو نئے انتظامی یونٹس کی شکل دینے سے خطے میں صوبائی اداروں کے قیام، سرکاری محکموں کی توسیع، بہتر طبی سہولیات اور اعلیٰ تعلیمی مراکز کے قیام کے امکانات پیدا ہوسکتے ہیں۔ اس سے چشتیاں سمیت دیگر اہم علاقوں کو انتظامی طور پر ترقی دینے اور عوام کے لیے سرکاری خدمات تک رسائی آسان بنانے میں مدد مل سکتی ہے۔

ان کا کہنا تھا کہ موجودہ آبادی، جغرافیائی وسعت اور عوامی ضروریات کے پیش نظر بہاولپور ڈویژن میں نئے اضلاع، تحصیلوں اور انتظامی ڈھانچے کی تشکیل پر بھی توجہ دینے کی ضرورت ہے۔ انہوں نے زور دیا کہ نئے صوبوں کے قیام کے ساتھ ہر ضلع کے اسپتالوں کو جدید سہولیات سے آراستہ کیا جائے، میڈیکل کالجز اور جامعات قائم کی جائیں اور عدالتوں و ریونیو دفاتر میں عملے کی کمی دور کی جائے۔

محمد مکرم خان نے نومبر 2026 میں نئے صوبوں کے قیام سے متعلق تازہ سیاسی سرگرمیوں کا حوالہ دیتے ہوئے کہا کہ سابق وفاقی وزیر اطلاعات محمد علی درانی نے 10 نومبر کو بہاولپور میں پریس کانفرنس کے دوران صوبہ بہاولپور کی بحالی اور ملک میں مزید 11 چھوٹی انتظامی اکائیوں اور صوبوں کے قیام کے لیے تحریک شروع کرنے کا اعلان کیا۔ بعد ازاں 12 نومبر کو ملتان میں بھی بہاولپور، جنوبی پنجاب اور ہزارہ صوبوں کے قیام کا مطالبہ سامنے آیا۔

انہوں نے کہا کہ آئین پاکستان کے آرٹیکل 239 کے تحت نئے صوبے کے قیام یا صوبائی حدود میں تبدیلی کے لیے آئینی ترمیم کا طریقہ کار موجود ہے، جس کے لیے پارلیمنٹ کے دونوں ایوانوں اور متعلقہ صوبائی اسمبلی میں دو تہائی اکثریت درکار ہوتی ہے۔ اس لیے اس معاملے کو سیاسی اتفاق رائے اور آئینی تقاضوں کے مطابق آگے بڑھانا ضروری ہے۔

انہوں نے حکومت، سیاسی جماعتوں اور منتخب نمائندوں پر زور دیا کہ وہ خطہ بہاولپور کے عوام کی دیرینہ محرومیوں کو سنجیدگی سے دیکھیں اور ایسا انتظامی نظام تشکیل دیں جس سے تعلیم، صحت، انصاف اور دیگر بنیادی سہولیات تک عوام کی رسائی آسان ہو۔

محمد مکرم خان نے کہا کہ صوبہ بہاولپور کی بحالی ہو یا نئے صوبوں کا قیام، اس کا حقیقی فائدہ اسی وقت ممکن ہے جب عام شہری کو اپنے علاقے میں معیاری تعلیم، بروقت علاج، آسان انصاف اور سرکاری دفاتر تک سہل رسائی حاصل ہو۔ صوبوں کی تشکیل کا مقصد محض نقشے پر نئی سرحدیں کھینچنا نہیں بلکہ عوام اور حکومت کے درمیان فاصلے کم کرنا اور محروم علاقوں کو ترقی کے یکساں مواقع فراہم کرنا ہونا چاہیے۔

متعلقہ خبریں