چشتیاں: پل نہر فتح پر پولیس اور ڈاکوؤں میں مقابلہ، ایک ڈاکو اسلحہ اور مسروقہ موٹرسائیکل سمیت گرفتار

چشتیاں: چشتیاں کے قریب پل نہر فتح پر سی سی ڈی پولیس اور ڈاکوؤں کے درمیان مقابلہ ہوا۔ مقابلے کے بعد ایک ڈاکو کو اسلحہ اور مسروقہ موٹرسائیکل سمیت گرفتار کر لیا گیا جبکہ دوسرا ڈاکو فرار ہونے میں کامیاب ہو گیا۔

اسسٹنٹ سب انسپکٹر فہیم عالم کے مطابق وہ اپنے پولیس جوانوں کے ہمراہ مجرمان اشتہاری اور سماج دشمن عناصر کی گرفتاری کے لیے پل نہر فتح شہید چوک پر نصف رات موجود تھے۔ اسی دوران شہید چوک کی جانب سے ایک موٹرسائیکل جس پر دو افراد سوار تھے، آتی دکھائی دی۔

پولیس نے ٹارچ کے ذریعے رکنے کا اشارہ کیا لیکن انہوں نے رکنے کی بجائے پولیس پر فائرنگ شروع کر دی اور تیز رفتاری سے چشتیاں شہر کی طرف موٹرسائیکل بھگا دی۔ تاہم موٹرسائیکل بے قابو ہو کر پل نہر فتح کی دیوار سے ٹکرا گئی۔ اس حادثے میں پیچھے بیٹھا شخص اور موٹرسائیکل زمین پر گر پڑے جبکہ دوسرا شخص رات کی تاریکی کا فائدہ اٹھاتے ہوئے فرار ہو گیا۔

پولیس نے زمین پر پڑے شخص کو گرفتار کر لیا۔ ملزم نے اپنا نام اور پتہ محمد سلیم عرف سلیمی ولد محمد نواز قوم جوئیہ سکنہ پیر شاہ بہاولنگر حال چک 123/6R ہارون آباد بتایا۔ ملزم کے قبضے سے ناجائز پسٹل اور ایک موٹرسائیکل سوزوکی 110 برآمد ہوئی جو ہارون آباد کے مقدمہ نمبر 163/26 میں مسروقہ پائی گئی۔

زخمی ملزم کو تحصیل ہسپتال چشتیاں منتقل کر دیا گیا۔ پولیس نے ملزمان کے خلاف دفعات 324، 353، 186، 411، 34 اور ناجائز اسلحہ رکھنے کے الزام میں مقدمہ درج کر کے تفتیش شروع کر دی ہے۔ فرار ہونے والے دوسرے ملزم کی تلاش جاری ہے۔