چشتیاں: دومسلح گروپوں میں تصادم، گن مین کے مبینہ تشدد کی ویڈیووائرل، پولیس خاموش تماشائی
چشتیاں: (خصوصی رپورٹ) چشتیاں میں ہائی وے روڈ پر واقع اتفاق ٹریولز کے قریب دو مقامی گروپوں، گکھڑ گروپ اور نواز باجوہ گروپ، کے درمیان مبینہ طور پر جھگڑے اور تصادم کا واقعہ پیش آیا، جس کے بعد صورتحال کشیدہ ہو گئی۔
ذرائع کے مطابق تصادم کے دوران نواز باجوہ گروپ سے منسلک ایک گن مین پر الزام ہے کہ اس نے گکھڑ گروپ کے بعض ڈرائیوروں کو اسلحے کے زور پر تشدد کا نشانہ بنایا۔ واقعے کی مبینہ ویڈیو بھی سوشل میڈیا پر وائرل ہو گئی ہے، جس میں جھگڑے اور ہنگامہ آرائی کے مناظر دیکھے جا سکتے ہیں۔
عینی شاہدین کے مطابق اطلاع ملنے پر تھانہ اے ڈویژن چشتیاں کی پولیس موقع پر پہنچی، تاہم واقعے کے باوجود کسی فریق کے خلاف فوری قانونی کارروائی عمل میں نہیں لائی گئی۔
تاہم مقامی ذرائع کے مطابق مبینہ طور پر ایک طاقتور مقامی سیاسی شخصیت کی مداخلت کے باعث پولیس کوئی قانونی کارروائی عمل میں نہیں لا سکی۔
بعض حلقوں کی جانب سے یہ الزام بھی عائد کیا جا رہا ہے کہ ایک بااثر سیاسی شخصیت کی مداخلت کے نتیجے میں پولیس نے مذکورہ مسلح افراد کے خلاف کارروائی سے گریز کیا، تاہم اس حوالے سے متعلقہ حکام یا نامزد شخصیات کی جانب سے کوئی باضابطہ مؤقف سامنے نہیں آیا۔
واقعے کے بعد شہری حلقوں نے مطالبہ کیا ہے کہ وائرل ویڈیو اور دستیاب شواہد کی روشنی میں غیرجانبدارانہ تحقیقات کرائی جائیں اور اگر کسی فرد کی جانب سے قانون شکنی یا تشدد ثابت ہو تو اس کے خلاف بلاامتیاز کارروائی کی جائے۔
آخری اطلاعات تک مقامی یا ضلعی پولیس کی جانب سے واقعے کے حوالے سے کوئی باضابطہ ایف آئی آر یا تفصیلی بیان جاری نہیں کیا گیا تھا۔